នៅល្ងាចថ្ងៃទី ២២ ខែកុម្ភៈ ឆ្នាំ២០២៥ ព្រឹត្តិការណ៍រាត្រីសមោសរសប្បុរសធម៌ត្រូវបានប្រារព្ធឡើងនៅសារមន្ទីជាតិ រាជធានីភ្នំពេញ ក្រោមកិច្ចសហការរវាងក្រសួងវប្បធម៌និងវិចិត្រសិល្បៈ ជាមួយនឹងសមាគមឱសថការីខ្មែរនៅប្រទេសបារាំង។ កម្មវិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់ លោកជំទាវបណ្ឌិត្យសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងមានវត្តមានយាងដ៏ខ្ពង់ខ្ពស់បំផុតពី សម្តេចរាជបុត្រីព្រះអនុជ នរោត្ដម អរុណរស្មី សមាជិកព្រឹទ្ធសភានៃព្រះរាជាណាចក្រកម្ពុជា ថ្នាក់ដឹកនាំ និងសមាជិក សមាជិការដ្ឋសភានៃព្រះរាជាណាចក្រកម្ពុជា ឯកឧត្ដម ហួត ហាក់ រដ្ឋមន្ត្រីក្រសួងទេសចរណ៍ អង្គការមូលនិធិ ឌីភីប៊ី សមាគមឱសថការីខ្មែរនៅប្រទេសបារាំង តំណាងមន្ទីរពេទ្យគន្ធបុប្ផា សៀមរាប មន្ទីរពេទ្យកុមារអង្គរ ខេត្តសៀមរាប មជ្ឈមណ្ឌលព្យាបាលកុមារបេះដូងជប៉ុន ឯកឧត្ដម លោកជំទាវ លោក លោកស្រី ជាភ្ញៀវកិត្តិយសជាច្រើនទៀត។ សប្បុរសជនមកពីគ្រប់វិស័យ រួមមានវិស័យនយោបាយ វិស័យពាណិជ្ជកម្ម បានប្រមូលផ្តុំគ្នាដើម្បីរួមចំណែកផ្តល់កម្លាំងចិត្តដល់សង្គមជាតិ នៅក្នុងសារមន្ទីជាតិ ដែលជាទីតាំងពោរពេញដោយអត្តសញ្ញាណប្រវត្តិសាស្ត្រ និងវប្បធម៌ជាតិ។
លោកជំទាវបណ្ឌិត្យសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានមានប្រសាសន៍ថា៖ “កម្មវិធីនេះ មិនត្រឹមតែគោរពដល់វប្បធម៌ និងប្រពៃណីខ្មែរប៉ុណ្ណោះទេ ថែមទាំងបង្ហាញពីសេចក្តីស្រលាញ់ក្នុងសង្គម។” លោកជំទាវបានលើកទឹកចិត្តដល់សប្បុរសជនដែលមានវត្តមានក្នុងកម្មវិធីនេះទាំងអស់ឱ្យចូលរួមវិភាគទានដោយសប្បុរស ដើម្បីរៃអង្គាសថវិកាសម្រាប់មន្ទីរពេទ្យកុមារកម្ពុជា ដោយធានាបាននូវការផ្គត់ផ្គង់ផ្នែកវេជ្ជសាស្ត្រសំខាន់ៗទៅដល់កុមារដែលត្រូវការជំនួយ។
កម្មវិធីរាត្រីសមោសរ ក៏មានកម្មវិធីសម្ដែងសិល្បៈទស្សនីយភាព និងប្រគំបទភ្លេងជាច្រើន ដែលបង្ហាញពីភាពទាក់ទាញពិសេស និងសារៈសំខាន់ដ៏ជ្រាលជ្រៅនៃវប្បធម៌ខ្មែរ។ ក្នុងរាត្រីដែលមានបរិយាកាសពោរពេញដោយអត្តសញ្ញាណសិល្បៈវប្បធម៌នេះ ទឹកចិត្តនិងសកម្មភាពសប្បុរសធម៌របស់សប្បុរសជនដែលមានវត្តមានក្នុងកម្មវិធី ជាកម្លាំងជំរុញនិងគាំទ្រសម្រាប់ការអភិវឌ្ឍន៍ផ្នែកសុខភាពកុមារនៅកម្ពុជា។
នាឱការនេះអង្គការមូលនិធិ ឌីភីប៊ី បានចូលរួមបរិច្ចាគថវិកាចំនួន ៥០០០ ដុល្លារអាមេរិក។ សូមបញ្ជាក់ផងដែរថា អង្គការមូលនិធិ ឌីភីប៊ី គឺជាអង្គការសប្បុរសធម៌មួយដែលបង្កើតឡើងដោយលោកឧកញ៉ា លោក តឹង ភីពីង ក្នុងគោលបំណងចូលរួមជួយសង្គ្រោះដល់ជនក្រីក្រនៅកម្ពុជា ហើយបានធ្វើការយ៉ាងសកម្មក្នុងកិច្ចចូលរួមលើកកម្ពស់សុខុមាលភាព និងការអប់រំដល់ក្រុមជនងាយរងគ្រោះនិងត្រូវការជំនួយ តាមរយៈការបរិច្ចាគថវិកាផ្ទាល់ខ្លួន ក៏ដូចជារៃអង្គាសថវិកាពីបណ្តាគ្រប់ម្ឈដ្ឋានផងដែរ ។
ព្រឹត្តិការណ៍រាត្រីសមោសរសប្បុរសធម៌នេះ បានផ្តល់ក្តីសង្ឃឹមដល់កុមារកម្ពុជាជាច្រើនដែលប្រឈមនឹងជំងឺ ហើយបានបន្លឺឡើងនូវស្មារតីនៃសេចក្តីស្រឡាញ់ និងសប្បុរស។ យើងជឿជាក់ថា អំណាចនៃសប្បុរសធម៌នឹងបន្តជំរុញឱ្យមានអំពើសប្បុរសកើតឡើងបន្ថែមទៀតនៅលើទឹកដីនៃប្រទេសកម្ពុជាដ៏កក់ក្តៅនេះ។